Schlotfeecher

Der typische Schlotfeecher zwischen Kulmbach und dem Rest der Welt ist ein Mann in einem schwarzen Fräckla, der meistens dann auf der Bildfläche erscheint, wenn man a) gerade früh auf dem Klo sitzt oder b) von der Fraa mittags den ersten Kloß neber die braat’n Rippla gelegt bekommt: „Dunnerwetter, wer klinglt denn etz scho widder um die Zeit?“ Eilends a) bewältigst du den rektalen Läuterungsprozess beziehungsweise b) schiebst den ersten Bissen Kluuß hinein, der dir gleich wieder aus dem Gesicht fällt: „Weddernei, is der haaß!“

Du flitzt zur Haustür und machst auf: „Griß Gott, der Schlotfeecher is do!“„Des hob ich fei aa scho gemerkt“, denkst du dir, sogst obber nix, denn einen Schlotfeecher verärchert mer net: Wecher die Immissionswerde und wechern aldn Feierlescher und überhabd, wal aufm untern Schlot-Türla zegor nuch der Reichsadler drauf is …
Also naufgsabbt und die Zuuchtreppn runter: „Sie wiss’n ja scho wu’s weitergit …?“ „Freilich“, lacht der Schlotfeecher und klettert aufm Doochbuudn nauf. Korz drauf heerscht es, wie’s ries’lt, und knapp fümf Minut’n drauf knarz’n scho widder die Breeder.

In der Zwisch’nzeit hast du a) noch amol überprüft, ob dei Hintern werglich sauber oogewischt is beziehungsweise b) na erschtn Kluuß und des erschta braata Rippla verdrückt. Du gist naus und der Schlotfeecher kumt scho die Trepp’n runter. Die Rechnung kriggst aa gleich und du seufzt: „Asu vil Geld für su wenich Ärbert. Des verdient ja net amol a Akademiker.“ Lacht der Schlotfeger: „Deshalb bi ich ja aa kaner wor’n!“

Schneller als die Werbung erlaubt

An neia Staubsaucher hom mer uns zugeleecht: Na schnellsdn. Ausm Sonderongebod. Vierhunnerdneinzich Euro. Zwaahalbtausnd Watt, Chrom-Raster-Teleskoprohr, Leichtmetallfelgen, Zentrifugalkraftumwandler, Doppelauspuff-Verkleidung, stratoblausilber. Zehn Quadratmeter Debbichbudn in fünf Sekund’n.

Gestern siech ich mei Fraa, wie sa im Hausblotz na Dreek ve meina Gaddnschuh mit’n Hondbesla und Schaifela zammkehrt. Sooch ich „Wos is’n, ich denk mir hom an neia Staubsaucher? Zwaahalbtausnd Watt, Chrom-Raster-Teleskoprohr, Leichtmetallfelgen, Zentrifugalkraftumwandler, Doppelauspuff-Verkleidung, stratoblausilber. Zehn Quadratmeter Debbichbudn in fünf Sekund’n.“

Socht mei Fraa „Bis ich des Ding ven Keeler raufschlaaf und no’n Strom ooschließ, bi ich mit mei’m Beesla scho ferdich.“

-psg-

zurück zur Hauptseite