Glaubensfrage
Die kla Maria is in ihra Ferien a poor Tooch
be ihrer Dande eigelod’n und stellt gleich a Frooch
„Sooch, Dande, worum hobt denn ihr zwaa, du und Onkl Günther
obwull ihr lang verheiert seid, bis heit nuch kana Kinder?“
Die Dande is verleeng zeerscht, dann socht sa drauf und lacht
„Der Klapperstorch hot uns bis heit halt kana nuch gebracht …“
Darauf die kla Maria „Sooch blus, Dande, is des wohr?
Wenn ihr nuch oo den Storch glabbt, no, dann is mir alles klor …“
Pro und Gunda
Es wo’ be Bamberg in der Näh’:
Der Fritz, der hot die Gunda g’seh’,
und eh nuch g’socht wor’n fuchza Wort,
sen sa scho mit’rananner g’schnorrt.
A poormol Sunntoch nochmittoch –
dann worsch für’n Fritz a gor ka Froch:
Die Gunda is fer mich gedocht!
Soch – mogst mich heier’n? hot er g’frocht.
Ich mechert dich scho gern zen Mo,
die Gunda socht’s, bluß ich bi’ Pro …
Wos, Himmel? schnappt der Fritz entsetzt,
und scho schaut’s Madla ganz verletzt:
Ich ho’s gedocht! Etz werscht mich meiden!
Pro-stituierta mogst net leiden!?
Do drückt der Fritz sa ganz romantisch:
G’fercht ho’ ich, du bist pro-testantisch …!
Durchblick
Zwa Freundinnen, die sitzen zamm in ihr’m Café
und waafn schee
Do maant die ana „Du, ich muß heit aweng ehrer weg
zen Optiker om Eck:
Mei alda Brill’n, die tut’s net mehr –
zen Ausgeh’ muß a neia her …”
Do grinst die anner “Ko’s d’ mer vil derzil’n
ve aner neia Brilln.
Do müsst ich dich net besser kenna –
siech ich dich mit dei’m Freind rumrenna,
do setzt nie ana auf – haha!“
Do sogt die erscht: „Er find mich ohna Brilln vil schenner
und ich na aa …“
Unentschieden
Der Urlaub aufm Bauernhuf – beliebt und sehr bekannt
a Ehepoor kimmt aus der Stodt, macht Ferien om Land
der Bauer nimmt sa auf die Koppl miet und be der Heck’n
do säing die drei na Zuchtbulln zu ben Deck’n
Do frocht die Fraa: „Wie oft mol ko der Stier pro Tooch denn su?“
„Wenns saa muss“, lacht der Bauer, „git der zwanzichmol drauf zu.“
Socht die Fraa ze ihr’m Moo: „Hostes gheert, wos der ko?“
Do frocht der Moo: „Sooch, Bauer, steigt der immer auf die selba?“
„Nanaa“, socht drauf der Bauer, „der macht jeder Kuh a Kälbla.“
Socht der Moo ze der Fraa: „Etz waasta des aa!“
-psg-