Reiner Kuhfall

Der Müllersbauer und sei Nochber hogg’n dum ben Wirt
der Nochber lametiert
„Mei aana Kuh will nix mehr fressn und verliert Gewicht
wos mer su sicht …“

Socht der Müllersbauer: „Su a Kuh wor aa be mir im Haufn,
ich gob ihr Terpentin ze saufn …“
Na nächst’n Dooch rufts oo ben Müller –
der Nochber tut an Ries’nbrüller:

„Sauf selber Terpentin, du Depp –
ich ho’s probiert, mei Kuh is gfreggt!“
Drauf maant der Müller: „Ja?
Die meina domols aa!“

Hobbygärtner

Mer kennt sa ja, die Hobbygärtner mit ’n grüna Dooma
die polier’n zegor a jeda Pflooma
und schneid’n na Ros’n mit der Fingernoglscher
ganz elitär

Der aana socht zen Nochbern nüber über’n Zaun: „Mei Lieber
deina schenn Tomat’n sen Kaliber –
wos machsta denn, dass die su schee ruut wer’n?
Meine Herr’n!“

„No ja“, erklärt sei Freind, „des soll ka gruß Geheimnis saa
jed’n Sunntoch früh, do läfft mei Fraa
im Evaskostüm durch’n Gart’n, was bewirken tut
die Toma’n wer’n ruut …“

Zwaa Woch’n später treff’n sich die beiden Pflanzstrategen
„Host es probiert?“ Der anner socht „Von wegen –
be die Tomat’n worsch umsunst, bluß – ohna etz ze flachsen
die Gurk’n wachsen!“

Wirtschaftswissenschaft

Die alt Fraa Wimmer stit vorm Boohuuf und wart aufn Bus
do kummt die alta Meiersch Rett, die is aa gut ze Fuß
„Ja grieß Sie Gott, Fra Meier, wie lang hom mir uns net gsäing,
wos is in derer Zeit denn auf der Welt su alles gschäing?“

Und scho sen sa om Ratschn, ve die Kinner, ve die Männer
ven Gart’n und ven Oozieng über Blusn bis ze Hemmer
und widder ze die Enkl, wos die domm und alles mach’n
do red’n sa mit Händ’er Fieß und lossn’s richtich krach’n

„Mei aaner Enkl is a Viech,“ socht stolz die Meiersch Rett
„der studiert Wirtschaftswissenschaft, is oo der Unität!“
„Do hot der Bu ganz recht,“ nickt vull Verständnis die Fra Wimmer
„Wirtschaftswissenschaft is gut, denn gsuffn, des werd immer!“

-psg-

zurück zur Hauptseite