Die Ries’nrutsch’n

Ach bitte, Papa, socht mei Klaaner
a Draufgänger wie sunst ner aaner
die Sunna scheint, heit is su schee
kumm, loß uns doch noch Wärschberch geh

Die Ferien sen, und worm is aa
lus git’s mit Gunga und mit Fraa
Bodtiecher, Deck’n, wos ze les’n
die Kühlbox mit aweng ze Ess’n

Vier Edelherb, zwaa Limoflasch’n
für’n Gunga nuch aweng ze Nasch’n
in Kufferradioapperot
su fohr’n mer nauf neis Woldschwimmbod

A Plätzla fand’ mer gleich, grod richtich
und ohna Emetz’n, ganz wichtich
die Muck’n sen gleich weiterg’stabbt
der Nochber hot a Keesbrot g’habt

Mei Onhong hot sich unverdrossen
behängt mit Taucherbrill’n und Floss’n
mei Fraa socht, ich gi aa zen Schwimma
dir tät’s aa gut, awengla Trimma

Dann wor’n sa fort, ich ho mei Ruh
schau ganz entspannt die Wölkla zu
und denk, do mußt da öftersch rei
su muß ‘s im sibt’n Himm’l sei

Do schreit mei Gunger, Papa komm
wos die do für a Rutschbohn hom
allans bluß trau ich mich net no
ach bitte, rutsch amol mit ro

Wos macht a Papa – also auf
aufs Edelherb na Deckel drauf
na Bauch awengla eigezuung
bi ich zer Rutsch’n mit noch um

Des is a Ding, ja wetternei
Mei Bu schreit, Papa – einwandfrei
etz git’s gleich nunter mit Gezeter
ich denk bluß „Hunnertsibbza Meter!“

Die Bärschla, ringsherum om Stier’n
do läßt der doch kan Scheißer spür’n
ich hock mich hie und holdrio
do ziecht’s mich aa scho ärschlings no

Mei Gunger hinter mir, der lacht
ich hör na blusner – Odiwocht
des Wasser spritzt mer vull neis Aach
die Luft werd knapp – die Knie ganz waach

Zer link’n und zer recht’n Seit’n
bi ich om Schliddern und om Gleit’n
dann fehlt mer gänzlich die Balance
und ich rutsch auf’m Buckel ganz

A Kurv’n ziecht sich elegant
bluß ich bi auf’m Bauch geland’t
und Mund und Nase bilden lose
mit Kunststoff eine Symbiose

Ich denk bluß nuch, ich muß mich richt’n
und mach an Zappler, da – mitnichten
mein Körper hat sich selbst gefunden
kopfüber zisch ich jetzt nach unten

Bestimmt mit hundert oder schneller
die Gegend vorn wird hell und heller
dann macht’s an Klatscher und ich bin
mit einem Mal im Wasser drin

Jetz nix wie raus aus diesem Becken
verschnaufen und die Wunden lecken
do schreit mei Sohn, Papa paß auf
dei’ Huus’n schwimmt om Wasser drauf

Zwaa Madla, um die ochtza Johr
om Beck’nrond krieg’n Stielaang gor
die Hus’n no, ich sooch zum Sohn
jetz rutsch alla, du ko’st des schon

Dann wank ich nüber auf mei Deck’n
tu Orm und Baa mit Stöhnen streck’n
in dem Moment – mei Fraa is kumma
und socht: Wie schö’ – bist aa aweng g’schwumma?

-psg_

zurück zur Hauptseite