Die Wunder vom Jesus
Prolog (Vorg’schicht’)


Sitz ich neilich o’ mein Läbbdobb
denk ich mer, wos machsta etzt:
Asterix und grußa Dichter
homs scho fränkisch übersetzt

Liegt do auf der Küchneckbonk
nuch des G’songbuch ve mein Sohn
der hot neilich erscht a nei’s kriegt
auf die Konfirmation

Und su schau ich do awengla
in des dicka Büchla nei
wie ich a poor Seiten blätter
fällt mer scho dezu wos ei’

Mensch, denk ich, die Wunder Jesu
hot nuch kaans auf fränkisch g’macht
wie ich’s meiner Fraa erzillt hob
hot sa fast grodnaus gelacht

Mach’s doch einfach, hock dich no’
des wos der ei’fällt, machst doch eh
allaans des etz is scho a Wunder
wie’s d’ kumma bist auf die Idee

Noja, su hock ich also do
und bi auf des, wos kummt, recht g’spannt
ich reim halt einfoch mol drauf zu
und wenn’s wos werd, sog ich „Schen’n Dank“

Die Speisung ve die Fünftausend

Am See da von Tiberias, da war einst ein Event
so konn mer’s heut noch les’n im Neuen Testament
fünftausend Leut sen kumma ze derer Attraktion
der Jesus hot gepredigt ganz ohna Mikrofon

Dass mer na hör’n ko, hot er sich auf a Bergla g’stellt
und alles kummt gut rüber, wal jed’s die Gosch’n hält
an Dorscht braucht kaaner leiden, gleich neb’ndron is der See
doch langsam knorrt der Hunger, ka Wertshaus in der Näh’

Wos mach mer mit die Leit do? Der Philippus schaut matt
Mir hom zwaahunnert Euro, devo’ werd kaaner satt!
Do sogt sei Freind Andreas, der hint’n rauskummt ve die Büsch
„Do vorn hot su a Läuser fünf Labla und zwaa Fisch!“

„Wos nutzt des bißla Brotzeit?“ Philippus lacht wie Sau …
Do sogt der Jesus „Klappe! Etz mach’n mir auf Schau!
Lasst alla Leut sich lagern, gebt mir die Brotzeit her
dann werd‘ ihr amol schaua, wie ich des Zeug’ vermehr’“

Fünf Labla, zwaa Sardina – mehr liegt im Körbla net
der Jesus dankt und sogt dann „Kummt alla ons Büfett!“
Für jeden der fünftausend drei Semmela, zwaa Fisch
die ziecht er aus’m Körbla, und alles schmeckt ganz frisch

Net jeder zwingt sei Brotzeit, wo mer wos übrig lässt
do schickt der Jesus Jünger, die sammeln ei’ na Rest
zwölf Körb’ vull trog’n sa zamm do, den Jesus freut des gruß
„Ich lod euch ei’ zum Ess’n, Sunntoogs gibt’s Semmlkluß!“

Die Leut, die wor’n begeistert, den Jesus schreckt des G’werch
drum sogt er: „Leut, ich gi etz allaans do auf mein Berg.
Und hot aans doch nuch Hunger, dann laaft nooch Kana ‘nauf
do gibt’s a Pizzeria, die hot bis aans nuch auf!“

-psg-

zurück zur Hauptseite