Auszugsweise

Der Erwin is a Jächersmoo, bluß ziemlich schlecht im Schieß’n
des Wild hot sich scho kronk gelacht im Wold und auf der Wies’n
und wenn der Erwin aufm Onsitz ooleecht do sei’ Flint’n
dann schleicht der Hos su wie des Reh sich schee verbei ve hint’n

In Erwin hot sei Fraa etz g’socht: „Heit brengst mer schee an Hos’n
a Johr long gista scho nei’n Wold und keine Wiggn g’schoss’n
ich denk scho ball, du host a Freindin, wall ich gor nix siech
etz reiß dich zamm, schieß net verbei, ansunst’n hommer Kriech!“

Der Erwin also fort ze frieh um viera be der Nocht
mit Flint’n und mit Rucksock auf die Kanzl naufgekracht
a Stund vergit, die zweita und des git auf siema zu
des ganza scheena Wild – anscheinend liechts in tiefer Ruh

„O Sankt Hubertus, steh mir bei, wos mach ich be dem Pech
wenn ich kann Motzer hambreng, dann läfft mir mei Olda weg!“
Doch alles Flehen wor umsunst, ka Häsla hot er gsäing
um ochta packt der Erwin zamm, is nei sei Auto gstieng

„Wos soll ich mach’n“, denkt er unterm Fohrn an Ausweech aus
auf amol kimmt’s na – horridoh – do is ja sei Freind Klaus
der hot na doch vorgestern g’socht, dass er an scheena Hoosn
im Kliefeld drieb’n erwischt hot, no – den muss er ieberloss’n

Der Erwin hot ein Riesenglück, der Klaus der is dehamm
und für an grössern Schein packt der na Hosnkrüppl z’amm
frisch aus der Kühlung raus und nei an Plastikbeidl nei
der Erwin zwickt na untern Orm, steicht nei sei Auto ei

Fährt ham zer Holdn „Schau, heit hots do endlich amol gschnackert!“
Sei Fraa packt aus „Wos is denn des, der Hos is ja ganz nackert –
den hosta kaaft, von weg’n g’schoss’n – des is glott geluung!“
„Naa“ socht der Erwin, „der hot sein Pelz zen Rammeln ausgezuung!“

Reiner Kuhfall

Der Müllersbauer und sei Nochber hogg’n dum ben Wirt
der Nochber lametiert
„Mei aana Kuh will nix mehr fressn und verliert Gewicht
wos mer su sicht …“

Socht der Müllersbauer: „Su a Kuh wor aa be mir im Haufn,
ich gob ihr Terpentin ze saufn …“

Na nächst’n Dooch rufts oo ben Müller –
der Nochber tut an Ries’nbrüller:
„Sauf selber Terpentin, du Depp –
ich ho’s probiert, mei Kuh is gfreggt!“

Drauf maant der Müller: „Ja?
Die meina domols aa!“

-psg-

zurück zur Hauptseite