Erinnerung

Der Heiner und der Korl hock’n im Park auf ihrer Bänk
do kummt a saubersch Madla, läfft verbei die strecksdeläng’

s‘ wor Summer, ja und worm worsch aa, des Madla gut gewachs’n
und offenherzig zeicht sa vill ven Bus’n, ve die Hax’n

Do seufzt der Heiner „Jessesna, wie wor doch unner Zeit –
wenn mir su weit wor’n, wie ’s d’ do siggst –  dann wor’n mer meist suweit …“

Erkenntnis

Der Schorsch hockt oo der Wertshausdeegn, glotzt su vor sich hi’
der schaut net links, der schaut net rechts, socht weder hott nuch hüh
„Wos is’n lus, Schorsch“ frocht der Wärt „host Ärcher oder wos
seit aner halb’n Stund bist do, stierst bluß ner nei dei Glos …?“

„Ach“, maant der Schorsch „ich ho mol grod su ieberdocht mei Le’m,
mei Fraa und ich wor’n zwanzig Johr su richtich glücklich g’we’n …“
„Und dann wor wull der erschta Krach?“ der Wärt frocht int’ressiert.
„Naa – dann hom mir uns kenna g’lernt“ socht drauf der Schorsch frustriert.

Erfahrungssache

Der Hermonn hockt im Wertshaus und haut a Brotzeit nei’
„No, Alter“, socht der Wert, „g’hört ho ich, du bist nimmer frei …?“

„Naa, ich ho g’heiert“, socht der Hermonn, „weil – ich ho’ entdeckt
dass mir die Wertshauskost auf amol nimmer schmeckt …“

„Und etz?“ frogt der Wert na ganz bieder
Mampft der Hermonn „Etz schmeckt sa mer widder!“

Herber(t) Verlust

Der Fritz, der hockt im Wertshauseck: „Ach goddela, hom mir a Welt …“
Su seufzt er vor sich hi’ und hot scho wider a nei’s Glos bestellt.

Der Wirt kummt ve der Thek’n her: „Mei Freind – wos is, wos dich su no’haut?“
„Ach“, socht der Fritz, „mei Fraa, die is’ heit mit mei’m Kumpel Herbert o’g’haut …“

Do nickt der Wert „Dei‘ Ehefraa, die hot der sicher vil bedeut’?“
Do greint der Fritz: „Die is mer worscht – doch um mein Kumpel tut’s mer leid!“

Erdbeerbowling

Das Telefon, es läutet, und es läutet grell
„Hallo, ist dort die Alkoholiker-Beratungsstell’?“

„Jawoll, Sie sind hier richtig, was ist es, was Sie plagt?“
„Ich wüsst’ sehr gerne, wie man eine Erdbeerbowle macht …“

-psg-

zurück zur Hauptseite