Es weißa Moped

Zer Kerwa worsch in Willmerschraith, a poor Johr is scho her
die Ortsborsch’n hom g’suffn ghobt und Raisch die kreizer quer
die Musik hot na Letzt’n g’spillt, der Wirt, der rechn’t o
do mach’n sich a poor nuch z’amm, wos mer nuch oostell’n ko

Daun stenges um die Lind’n rum wie Hansdampf nei die Niß
zwa sicht mer oo die Mauer saang, die Hälft läft auf die Fieß
der aa knöpfts Huusetürla zu und socht: Etz grod ben Saang,
do is mer eig’fall’n, um der Gerch, der hot an Buuk dehaam

Wenn aaner sich den reit’n traut – do wett ich zehn ze aans
a dreiß’ger Fäßla gib ich aus – auf dem, do hält sich kaans
An Scheißer läßt sich kanner soong – die Schleiß’n is debei
und aaner wie der anner drückt ben Gerch nein Huuf sich nei

De Buuk, der liecht im Gaaßnstool und schläft su vor sich hie
und traamt debei ve aaner halb’n Gaaßnkompanie
do schleicht sich scho der Oberortsborsch do zen Türla rei
und sicht den weiß’n Gaaßbuuk lieng und macht die Kiet’n frei

Der Gaaßbuuk tut an Schnelzer und scho hupft er kreizerweis
der Kunz derwischt na grodner nuch und schreit: Mir ghört der Preis
dann hält er oo die Hörner fest und rennt im Dauerlauf
do nebern Buuk quer iebern Huuf und schwingt sich gor nuch nauf

Der Gaaßbuuk meckert und tut Schraa und hupft wie Dynamit
der Kunz is aa net leiser, denn der Buuk schleecht na nein Schritt
die Hörner hält er eisern fest und zischt zen Dörfla naus
vor lauter Wercherei hängt scho der Orsch zer Huus’n raus

Do schreit die alta Rett, die immer frieh die Zeitung brengt
Ach Gottela, der junga Kerl, schau hie, wie der do hängt
der hot doch ka Benehma net, ko net amol des Spor’n
ka Geld hom für a Hemm om Orsch –
ober a weiß’ Moped fohr’n!

Miss(t)verständnis

Der Heinzla und sei Freund, der Bernd
hom widder in der Schul gelernt
etz genga sa ananner ham
und waafn zamm

„Die verta Nocht“ der Heinz socht su
„do schloof ich scho im Stool im Struh
bluß unner Kalm kricht’s Kälbla net –
des is a Gfrett!“

Do lacht sei Freind „Des is doch klor:
Die Kalm, die denkt ganz offenbor –
wenn die dich do im Struh lieng sicht –
sie hätt’s scho kricht …“

-psg-

zurück zur Hauptseite