Die gleiche Handschrift

Ins Amt, do kummt der Schindlers Heiner
der Personalausweis is fällig
drum werd der Heiner gleich am Schalter
mit seinem Anliegen vorstellig

„Etz wart’n S’ bittschön noch a bissla“
sogt der Bearbeiter ganz frei
der Heiner setzt sich on a Tischla
schaut in a poor Prospekte nei

Es dauert zirka zehn Minut’n
bis Heiner seinen Namen hört
„Herr Schindler?“ wird er aufgerufen
„Bei uns, do sind S’ leider verkehrt.

Sie müssten in den ersten Stock,
da gibt’s die neuen Ausweiszett’l …“
Der Heiner schluckt sein Ärger ro’
Worum sogt der’s erscht jetz’, der Bleedl?

Also die Treppn nauf zem nächsten
a Schalter wie im unter’n Haus
„Grüß Gott, ich bräucht’ an Ausweiszett’l
mei’ Personalausweis läfft aus!“

„Moment nuch, und sulang Sa wart’n
do gib ich Ihnen des do mit
do könne’ Sa scho amol ausfüll’n
wos do bei ‚Personalien’ stit!“

Der Heiner kriegt na Ausweisantrag
und hockt sich auf die Hulzbänk’ nauf
a Unterlag’ ve die Prospektla
dann schrebbt er seina Daten auf

„Herr Schindler?“ sogt des Schalterfräulein
„etz wär’s suweit, kumme S’ ne’ ruhig
wu hom mer denn den Ausweisantrag?
Etz mach mer schnell die Daten durch.“

Den alten Ausweis neb’n dem Antrag
vergleicht des Fräulein Punkt für Punkt
und nuchamol ve ob’n bis unt’n
bis sa zum Antragsdatum kummt

„Heit is der verzehnta September?“
„Ja freilich“, sogt der Heiner, „scho’ …“
Do maant des Fräulein „Nooch der Vierzehn
hom Sie den Punkt vergess’n do!“

„No, könne’ S’ den net selber mach’n?“
su frogt der Heiner die gut’ Fraa
„Naa, naa, ich derf do nix verändern
des muss die gleiche Handschrift saa!“

Beispielhaft

Neia Nochbern hom mer kricht
er a feiner Mensch
macht und werkelt fleißig rum
hot a klaana Rändsch

Sie hört mer mehr als mer sa sicht
na ganz’n Toog om gift’n
mol hackt sa auf ihr’m Olt’n rum
mol hot ses mit der Hüft’n

Vor a poor Toog, do gi ich grod
mit unnerm Hund spozier’n
do kummt sa mir doch grod entgeg’n
und tut uns o’visier’n

Is der bissig, eier Hund?
Aus fuchzich Meter schreit sa scho’
Na, sog ich, bissig is der net
nehma S’ sich ruhig a Beispiel dro’

-psg-

zurück zur Hauptseite