Pumpstation

Der Ewald und sei Freund, der Sima
fohr’n Samstog früh bei jedem Klima
naus on den neua Badesee
denn früh beiß’n die Fischla schee

Do hock’n sa auf ihra Hocker
die Angelschnür’, die hänga locker
a verz’ger Zigarr’n raacht a jeder
des hält die Schnookn ab vem Leder

An’n Samstog früh, do git der Wind
und scho – der ersta Surfer kimmt
su fuchzig Meter weiter draußen
do sichst na übers Wasser sausen

Jetz dreht er auf a Kurv’n ei
do macht’s an Platsch, me’ hört an Schrei
und Ewald sogt: Schau nieber, Sima
du, der dersaift uns nuch do d’inna

Wos soll ich mach’n, schau mich o’
du waßt, dass ich net schwimma ko’
der Sima zieht Hemm, Hus’n aus
und krault wie ein Verrückter naus

Grod nuch ko’ er na Surfer fass’n
bevor der ganz versinkt im Nass’n
und außerdem ging dem vor Schreck
bereits scho’ die Besinnung weg

Su ziecht der Sima na ons Ufer
gibt na behutsam einen Puffer
der Surfer hot net mol gezuckt
wohrscheinlich zevil Wasser g’schluckt

Dann packt der Sima dem die Orm
und hebelt sa ve hint’ nooch vorn
dem Surfer seine Haut wird blasser
der ersta Spruutz, der Mund spuckt Wasser

Nuch amol nauf die Orm und nunter
der Surfer spuckt, wird langsam munter
a dritt’s Mol und des Wasser schwallt
do ruft der Ewald: Sima, Halt

Der liegt mit’n halb’n Hintern do
im Badesee, du werchst dich o’
ziech na ganz raus und leg na quer
sunst pumpst du nuch den Weiher leer!

Re(h)likt

Der Pfarra wollt’ in Urlaub geh’ und desmol is’ geglückt,
denn als Vertretung hom sa na an junga Kaplan g’schickt.
Der stellt sich werklich aa net bled, der Pfarra weist na ei
und socht, wennst nuch wos wiss’n willst, kummst nei die Sakristei.

Im Beichtstuhl hockt der jung’ Kaplan, do klappert scho die Tür –
der Huber Sepp huscht eilig ‘rei und nimmt na ins Visier:
Herr Pfarra, socht die dunkla G’stolt, ich ho’ a Reh gewildert …
Der Kaplan im Bußkatalog sucht diese Sünd’ geschildert.

Wal er nix find’, socht er, mein Sohn, geduld’ dich an Moment –
Gleich sieht man dann den Herrn Kaplan, wie er zum Pfarra rennt:
Der Huber hot a Reh gewildert, wos geb ich denn dem Spund?
Der Pfarra socht, auf keinen Fall mehr als drei Mark für’s Pfund.

-psg-

zurück zur Hauptseite