Bänker unter sich

Be Voggedorf im Frankenwald, da sprach die Bauerschfraa
„Mei lieber Moo, der Kacheluufn stit su ganz allaa
des wär halt schee, wenn ich mir des su vorstell’ und su denk’
wie wärsch denn mit su aaner himmelblaua Uufebänk’?

Ich ho’ in an Proschpekt gsäing, suwos kricht mer in der Stodt
ich glaab, ich fohr heit nei, um mol ze säing, wos mer do hot
na Ernst, den nimm ich aa mit, der braucht a Poor neia Schuh“
Do schreit der Ernstla „Mudder, mit der Stodt loss mich in Ruh

Ich mooch net nei die Stodt, ich ho nuch für die Schul ze too!“
do maant der Vodder „Mudder, nimm na Willi halt mit noo …“
Der Klaa, net aufm Kupf g’falln, socht „Ich fohret do scho mit
doch blus, wenn mir der Ernst sei neia Bäisbollkabbm gibt“

A Hi’ e Her, zen Schluss is mit der Kabbm des geklärt
und mit’m Bulldogg werd vem Wold dann nei die Stodt geröhrt
die Mudder parkt na schee im Eck und dann git’s auf die Such’
denn schließlich soll a Bänk kaaft wer’n, do git die Zeit im Flug

A halba Stund im Stodtgewühl, die Fieß dom langsam wieh
do schreit der Willi „Mama, schau, do driem, do miss mer hi’“
„Host Recht“ nickt aa sei Mudder „do stit Volksbank auf dem Haus
do gibt’s bestimmt a Bank fürsch Volk und donoch säing mir aus …“

Die zwa, die genga durch die Tür, o’n erscht’n Schalter noo
a feiner Herr kummt gleich herbei, ob er wu helf’n ko
„Ja lieber Moo, a halba Stund, die dommer etz scho laafn
mir meechertn halt gor ze gern a Bänk für’n Uufn kaafn“

Der Mo schaut ganz verdattert, des verschleecht na glott die Sproch
und wie ersch wieder g’funna hot, do frocht er nuchmol nooch
„A Bänk woll’n S’ in der Volksbonk – Sie, des is ihr Ernst doch nicht?“
„Na naa, des is mei Willi, der hot nur ’n Ernst sei Kabbm kricht“

Glaubensfrage

Die kla Maria is in ihra Ferien a poor Tooch
be ihrer Dande eigelod’n und stellt gleich a Frooch
„Sooch, Dande, worum hobt denn ihr zwaa, du und Onkl Günther
obwull ihr lang verheiert seid, bis heit nuch kana Kinder?“

Die Dande is verleeng zeerscht, dann socht sa drauf und lacht
„Der Klapperstorch hot uns bis heit halt kana nuch gebracht …“
Darauf die kla Maria „Sooch blus, Dande, is des wohr?
Wenn ihr nuch oo den Storch glabbt, no, dann is mir alles klor …“

-psg-

zurück zur Hauptseite