Wie der Sohn vem Amtsmoo k’haalt worn is

Für jeden Menschen auf der Erde
konn’s net bloß Frohsinn täglich geem
auch dem Herrn Jesus schrieb schon damals
‘s Finanzamt von Jerusalem

„Es fehlt der Umsatz von drei Jahren.“
Der Jesus schrieb zurück „Mir auch
und außerdem, wos glabbt ihr Hörnla
wos ich on Reisespesen brauch …“

Das war vielleicht zuviel des Guten
der Jesus, der musst nei ins Amt
in aller Früh vor’m Eingangstürla
do hätt na aans fast umgerammt

A feiner Herr worsch mit Krawatt’n
der stürmt do vem Finanzamt raus
„Herr Jesus, dom s’ a bissla wart’n
ich muss schnell haam, mei Bu’, der Klaus …!

Mei Fraa hot grodner o’geruf’n
der Klaa liegt do, ganz blass und stumm
ich hoff, ich pack’s und ko na helf’n
haam muss ich nooch Kapernaum!“

Der Jesus sicht den orma Sünder
aa wenn er vem Finanzamt kummt
ganz friedlich sogt er „Brauchst net hetz’n
dei‘ Bu’ lebt und is widder g’sund!“

Der Moo, der schaut na o’, na Jesus
dann fährt er haam ze seina Leit
sei Kläusla springt na scho entgege’
mei, hot des den Finanzer g’freit

Wann is denn unner Kläusla gsund worn
su frogt er drinna, in der Stum
der aana Diener überlegt sich’s:
Des wor su ummer Siema rum

Grod um die Zeit, do hot der Jesus
doch g’sogt, sei’m Bübla fehlert nix
do dro muss der Finanzer denk’n:
A Wunder, und des ohna Tricks!

Der Jesus kriegt Toogs drauf a Briefla:
Des mit der Steuer hot sich geem –
auch die Finanzer machen Fehler …
an schön’ Gruß aus Jerusalem!

Jesus auf’m See

Die Sunna stond im Westen, die Jünger hom sich g’schickt
im Bootla nooch Kapernaum, des wor a ganz schön’s Stück
drum rudern sa noch Kräft’n, auf amol schreit der aa
„Mensch, Leitla, unner Jesus is aufm Berg allaa!“

„Wie könn’ mer den vergess’n! Amend schläft er do umm,
und wenn na kaaner aufweckt, vielleicht nimmt er’s uns krumm?
Kummt Leit, mir woll’n schnell wend’n, dann nehma mer na mit
sunst kriegt er nuch des Rheuma und werd uns invalid …“

Do seh’n sa scho na Jesus allaans om Strond do steh
auf amol nimmt der Onlauf und rennt quer übern See
„Halt’ eich schee fest, ich schieb euch, und fallt mir bluß net raus
a Angst, die braucht ihr net hom, des Bootla hält’s scho aus!“

Wie mit an Außenborder, su zischt des Bootla ab
der Jesus auf’m Wasser läfft locker leicht im Trab
„Dass mir des fei kaans noochmacht, do brauchst mentale Stärk’
für mich is’ selbst a Wunder, wie ich die Staa mir merk’!“

-psg-

zurück zur Hauptseite