Unentschieden
Der Urlaub aufm Bauernhuf – beliebt und sehr bekannt
a Ehepoor kimmt aus der Stodt, macht Ferien om Land
der Bauer nimmt sa auf die Koppl miet und be der Heck’n
do säing die drei na Zuchtbulln zu ben Deck’n

Do frocht die Fraa: „Wie oft mol ko der Stier pro Tooch denn su?“
„Wenns saa muss“, lacht der Bauer, „git der zwanzichmol drauf zu.“
Socht die Fraa ze ihr’m Moo: „Hostes gheert, wos der ko?“

Do frocht der Moo: „Sooch, Bauer, steigt der immer auf die selba?“
„Nanaa“, socht drauf der Bauer, „der macht jeder Kuh a Kälbla.“
Socht der Moo ze der Fraa: „Etz waasta des aa!“

Solidaridäd

A Kölner und a Düsseldorfer,
a Oberfrank wor aa debei
hock’n sich noo an Kneip’ntres’n –
der Kellner frocht: „Wos krächt ihr drei?“

Der Kölner socht „Für mich ein Kölsch“,
der Düsseldorfer „Mir ein Alt“
der Oberfrank „Ich kriech a Cola,
des ohne Eis und net su kalt“

Die annern zwaa sen ganz verstört:
„Wat – Cola? Bist du nit mehr janz …?“
Drauf socht der Oberfrank: „Wenn ihr
ka Bier do trinkt, trink ich aa kaans.“

Durchblick

Zwa Freundinnen, die sitzen zamm in ihr’m Café
und waafn schee

Do maant die ana „Du, ich muß heit aweng ehrer weg
zen Optiker om Eck:
Mei alda Brill’n, die tut’s net mehr –
zen Ausgeh’ muß a neia her …”

Do grinst die anner “Ko’s d’ mer vil derzil’n
ve aner neia Brilln.

Do müsst ich dich net besser kenna –
siech ich dich mit dei’m Freind rumrenna,
do setzt nie ana auf – haha!“

Do sogt die erscht: „Er find mich ohna Brilln vil schenner
und ich na aa …“

Wos bessersch

Im Supermarkt, do hot heit der neia Lehrling erscht’n Dooch
Entschuldigung – des haßt Azubi, trogt mersch etz net nooch
auf jed’n Foll, der junga Monn stit oo der hintern Tür
do wu des Personal blus neiderf, und er klingelt hier

A Freilein dinna macht na auf, drückt auf’n Summer do
verleg’n stit dann der junga Monn gleich korz drauf im Büro
an weiß’n Mant’l kricht er noo, der Chef, der führt na rum
und zeicht na nuch amol des ganza Inventarium

Zen Schluss, do drückt der Chef dem Azubi dann nuch die Händ’
und nei dieselb an Bes’n: „Jetz kehrscht z’amm“ socht er am End
„Pardon, ich habe Abitur“ maant do der junga Hacht
do lacht der Chef „Is klor – gib her, ich zeich der, wie mers macht!“

-psg-

zurück zur Hauptseite