Ku(h)lanz
Der Erwin und der Heiner, des worn zwa Bauern
net grod ve die dumma, sondern mehr ve die schlauern
die hock’n aanstoogs grod im Wertshaus besamm
und trink’n nuch aans und die welln nuch net haam
Su waafn sa hie und su waafn sa her
des Bier, des schmeckt gut und der Kupf wird scho schwer
do socht do der Erwin zen Heiner, horch noo
wos is denn mit dir, soch, wos git der denn oo?
Na ganz’n Omd denk ich, den Kerl muß wos ploong
du schaust nei die Luft, su als mechst mer wos soong
etz hock mer na ganzn Omd do in der Stumm
wennst mogst, heer ich zu – also sooch scho, worum
Noja, fängt der Heiner verleeng oo ze red’n
wos ich der etz sooch, des erzill ich net jed’n
ich ho a Problem in mein Kiehstool zer Zeit
a neia Kuh ho ich und die macht mer ka Freid
Sechsmol wor der Tierorzt scho do zen Besoma
doch maansta, des Viech is ruhich in alla Noma?
kaum nimmt do der Dokter die Spritz’n nei die Händ
do reckt doch die Kuh scho in Orsch oo die Wänd
Do frocht na der Erwin, soch Heiner – du waaft
grod als wennst da dei Kuh host in Hummadorf kaaft …
der Heiner staunt: Recht host – wie ko su wos saa?
der Erwin socht: Aus Hummadorf stammt aa mei Fraa!
Teamwork
A Mauerer läfft auf der Baustell umher
do schaut er die kreiz und do schaut er die quer
do kummt der Polier „Soch, wos is denn do lus
host du nix zen ärbern, wos suchst du denn gruß?“
„Ich brauchert a Breetla, su zwanzich auf zwanzich!“
„Ich hilf der, Moment, dann bist du net der aanzich.“
Ze zweit laafn sa auf der Baustell im Bund
do heert mer a Auto, der Architekt kummt
„Ja grißt eich, ihr zwaa, wos hobter denn do?
Wos gibt’s denn ze such’n do, wos git eich denn oo?“
„Hilf mit, dann git’s schneller“ su socht der Polier
„a Breetla, su zwanzich auf zwanzich braung mir!“
„Des wermer gleich hom“ maant er, der Architekt
aber noch zehn Minut’n is nix nuch perfekt
ve der Stroß heert mer etz a poor schnellera Schritt
der Bauherr is aa do: „Wos sucht ihr ze dritt?“
„Mir braung ung’fähr zwanzich auf zwanzich a Brett“
socht der Architekt zu na „bluß säing dommmersch net“
„No dass net lang dauert, do such ich halt aa
sunst läfft uns die Zeit weg, des braucht doch net saa“
Su suung sa, der Mauerer mitsamt na Polier
der Architekt und mit na Bauherrn sens vier
do schleechts auf der Kernguhr und Neina is aa
socht der Mau’rer „heert auf, zer Brotzeit tut’s heit a Staa!“
-psg-