Bluß nix Fett’s

Der Pfarrer und der Lehrer
wor’n auf der Worschtpartie
a Schüpf hot’s geb’n und Pressock
und Wärscht bis ob’nhi’

ven greßt’n Bauern eigelod’n,
hot’s die zwaa nix kost’
natierlich macht mer in dem Rohma
dann aa öftersch Prost

Su ging’s die halba Nocht durch
und des Spochtl’n heert net auf
durch Zufoll schaut der Pfarrer dann
auf seiner Uhr do drauf

„Mensch, halber aans“, socht er zen Lehrer,
„kumm, mir miss’n haam
dei Fraa und mei Haushältera,
wos meeng die ve uns glaam …“

Er packt na Lehrer unterm Orm,
a Päckla kricht er mit
mit Wärscht und Pressock,
wal der Bauer nuch a Brotzeit gibt

su sabb’n sa des Dörfla nauf,
bis wu die Baustell is
der aa nooch links, der anner rechts,
ganz wacklert auf die Fieß

Auf amol kummes oo an Groom,
im Finstern net ze säing
und scho wor unner Lehrer
in dem Baatz do drinna gläing

der Pfarrer, der is ganz derschrock’n,
kniet sich nei die Brieh
und untersucht sein Freind –
du lieber Gott, der is ja hi’!

Für’n Ernstfall stets gewappnet,
ziecht er gleich des Fläschla raus
wu des geweihta Öl drin is,
spricht’s Wort zur Ölung aus

do hört er, wie der Lehrer brummt,
„Herr Pfarrer, wart’n S’ etz
denn erschtens bi ich nuch net tuut
und zweitens – bluß nix Fett’s!“

Bissfest
Der Hans und sei Paula hom Goldhochzich ghott
die Feier recht lustich und des Jubelpoor flott
dann, wie’s Festla rum is, werds richtich erscht schee
die zwaa hock’n ganz allaans om Kanapee

Er riecht nei ihr Hoor und socht „Mensch riechst du gut
do denk ich doch grod, dass sich do nuch wos tut“
„Waast nuch“, socht sei Paula „wie’s uns domols hot g’riss’n?
Be der Hochzich host mich glott nein Hols neigebiss’n“

Do springt der Hans auf, trotz sein Kreiz und Rheuma
„Wos is denn, mei Hans, worum lässt mich allaa?“
„Ja Schatzl, wenn ich dich nein Hols beißn soll
brauch ich meina Zäh’, die lieg’n im Bod im Regol“

-psg-

zurück zur Hauptseite