Es Sporbügla
Die alt Oma Meier sicht mer früh, korz noch zehna
Nei die Raiffeisen schnurstracks no’n Schalter no’renna
A Tempo hot die guta Fraa grod nuch drauf
Die nehmerts mit ball jeder Jünger’n nuch auf
Om Schalter, do schaut sa net kreiz und net quer
Schreit zen Bänker om Schreibtisch „Junger Monn, kumma’s her“
Der denkt sich „Holloh, is die Fraa der gut drauf“
Und stit wie a Wiesl im Händumdreh’n auf
Wär er langsamer g’wesn und net su befliss’n
Hätt er sich net om Schreibtisch na Zwickel aufg’riss’n
Su hört er’s nuch ratsch’n – doch wos g’schehn is, is g’schehn
Versteckt langt er no – gottseidank nix ze seh’n
„Sie wünschen?“ su strohlt er die Meiera oo
die legt na pritschbraat do ihr Sporbüchla noo
und sogt „Des wos drauf is, mit Zinsen komplett
des leg’n S’ mer etz her und vill Zeit hob ich net“
Der Moo ve der Bonk klappt des Büchla sich auf
Dunnerwetter, do wor ja ganz schee scho wos drauf
Und die letzt’ Zinsberechnung log ocht Johr zurück
„Liebe Frau“ socht er „wart’n S’ an klan Augenblick“
Nimmt’s Büchla und rechn’t und trächt sorgsam ei
Die Oma werd wepsert und frocht, wos denn sei
Wie lang des nuch dauert um alles der Welt
Sie mechert nix annersch als einfoch ihr Geld
Der Raiffeisenmoo, ganz im Dienste des Kunden
Denkt, wennst des etz auszohlst, dann is sa verschwunden
Amend is do aaner, der wos sa betört
Der bluß oo ihr Geld will und Heirot’n schwört
Grod gestern, da worsch dro im Fernseh’ zer Nocht
Wos für Lump’n ält’ra Frauen um ihr Geld hom gebrocht
Und Enkel, die hom in der Schul scho gezockt
Und des Geld dann der Oma aus der Nos’n gelockt
Und wenn die Frau Meier wos o’schaff’n möchte
Dann wär doch a günstiges Darleh’n net schlecht
Die Zinsen sen niedrig wie lang scho net mehr
Die Oma socht „Nix do, mei Geld tom S’ mer her!“
Der Kunde is König – der Raiffeisenmoo
Schrebbt na Zett’l und winkt a Kollegin mit roo
Die prüft, unterschrebbt und dann git’s oo die Kass’
Des Männla do drinna, der schaut aa recht blass
„Wie meeng mersch denn hom?“ frocht er freindlich neitrol
die Oma socht „Wie gruß, des is mer egol“
dann sicht sa genau zu und zillt lauthols mit
wos on Euro und Cent auf’m Zahlbeleg stit
„Brauch’n S’ vielleicht einen Umschlog, do tu ich’s Geld nei?“
Die Oma socht „Naa, pack’n S’ all’s wieder ei’!
Etz bi ich beruhigt, lieber Raiffeisenmoo –
Des Geld ve mein Sporbuch is alles nuch do!“
-psg-