Die Heilung om Betesdaer Weiher
Om Schoofstor, außerhalb die Mauern
vo derer Stodt Jerusalem
do worn fünf Stodl hi’gezimmert
bluß kronka Leit wor’n drinna g’leeng
Deneber wor a Weiher g’wes’n
Betesda hom se na genennt
und wenn sei Wasser sich bewegt hot
dann sen die Leit nei’n Weiher g’rennt
Erklär’n worum, des konnt do kaaner
mer sogt halt, Engel fohr’n do nei
und wer als erschter kummt nei’s Wasser
is widder g’sund und schreit: Juchhei!
Der Jesus eines schönen Sabbats
der schaut sich dia Schupf’n o’
und sicht im Bett an Moo do lieg’n
der blußner kriech’n, net aufsteh’ ko’
Ich lieg seit ochtedreißig Johrna
scho rum do auf mei’m Pritsch’nbett
ka Sau hilft mir ins Weiherwasser
und ganz allaans, do pack ich’s net
Der Jesus schaut na o’, dann sogt er
Sti auf und nimm dei‘ Bett und gi’
dass’ net ze schwer werd, kriegst nuch extra
o’s Bett zwaa neua Rädla hi’
Der nimmt sei Bett, sogt net mol Danke
schiebt haam quer durch Jerusalem
die Leut dort seh’n’s: Du Sabbat-Sünder!
Heut macht mer nix, mir wer’n dir geem!
Do sogt der Moo: Tut mich net haua
mei Wunderheiler hot’s erlaubt
und dass mei Bett mir net ze schwer werd
zegor zwaa Rädla neu no’g’schraubt
Die Jerusalemer, die loss’n
den Moo dann endlich weiter zieh’n
„Schau, daß d’ dich schleichst, du alder Simpl
doch Sabbat is: Dei Bett lässt lieg’n!“
Seit dieser Zeit gibt es die Regel
schieb nicht dein Bett, ob alt, ob neu
quer durch Jerusalem am Sabbat
sunst handelst dir bloß Ärger ei’
Die Heilung ve dem, der wu nix g’sehn hot
Do wor do aaner g’wesn, der hot nuch nie wos g’sehn
der Jesus hot na ong’schaut und g’maant, do muss wos g’schehn
er nimmt a Händ vull Erd’n und spotzt awengla nei
dann rührt er mit der annern Händ des ganza Zeug ze Brei
Den Lahmabaatz, den schmiert er dem Blind’n auf die Aang
„Wasch dich om Teich Siloah, su dreckert gihst net haam!“
Der Mensch dabbt Richtung Weiher, in Richtung Frösch’gequaak
wie’s feicht werd o’ die Zeha, do buckt er sich ganz zag
Mit a poor Tropf’n Wasser, do spritzt er sich nei’s G’sicht
auf amol hörst na schreia: „Ihr Leut, ich siech a Licht!“
Vor lauter Freid, do springt er ins Weiherwasser nei
und zapplt wie a Hering, ersaift nuch fast debei
Die Leit, die soong, des gibt’s net, wos soll denn etz der Scheiß
der Blinda hot an Zwilling, und der macht uns wos weis
sei Vodder und sei Mudder schwör’n obber Staa’er Baa
ihr Bu’, der hot kan Zwilling, der wor sei’ Leem allaa
Die Grußköpf’, die berat’n, doch einig wer’n sa net
der Jesus heilt om Sabbat? Des macht doch ka Prophet
Su hom sa den Ex-Blinden schnell exkommuniziert
von wegen – suweit kummert’s nuch, dass aaner sa blamiert
Der Jesus kriegt des aa mit und lädt na auf aans ei’
brauchst dich net ärgern, sogt er, weecher die bleed’n Sai
die Grußköpf maana immer sich ganz stolz auf ihra Sockl
in Wärglichkeit seh’n sa an Dreeg und glotz’n wie die Mockl
-psg-